Os grupos municipais do BNG, Compostela Aberta, o Grupo Municipal Socialista e as concelleiras non adscritas acordaron presentar no pleno deste mes de xaneiro unha moción conxunta en apoio á nova mobilización convocada pola Plataforma SOS Sanidade Pública de Galiza, prevista para o 1 de febreiro. A protesta partirá ás 12:00 da Alameda e finalizará na Praza do Obradoiro, cun percorrido polo centro histórico de Santiago de Compostela.
Segundo recollen as formacións asinantes, a iniciativa pretende respaldar as demandas da plataforma fronte ao que consideran un deterioro progresivo do sistema sanitario público galego. Na exposición de motivos da moción sinálase que a política sanitaria da Xunta de Galicia está a favorecer un modelo no que o acceso á atención sanitaria depende cada vez máis do nivel de renda, abrindo a porta á privatización e á consolidación dun sistema dual.
O voceiro do Grupo Municipal Socialista, Gumersindo Guinarte, trasladou que o PSOE se suma ás denuncias que SOS Sanidade Pública vén formulando desde hai tempo. Nas súas declaracións, advertiu da deriva do sistema sanitario baixo o Goberno de Alfonso Rueda e apuntou a un empeoramento da atención primaria, a creación de barreiras de acceso aos centros de saúde e o aumento das listas de espera, cun conseguinte desvío de recursos cara á sanidade privada. Para o portavoz socialista, estas políticas están a provocar un deterioro continuado do sistema público.
A moción pon especial atención na área sanitaria de Santiago de Compostela, onde, segundo recollen os grupos, “as consecuencias desta política son xa plenamente visibles”. No documento faise referencia a datos das primeiras semanas de novembro de 2025, cando o servizo de Urxencias rexistrou máis de 485 atencións diarias e até 75 ingresos nunha soa mañá, incluso antes do pico da tempada vírica. Este volume asistencial elevou a ocupación de camas por riba do 89%, unha situación que, segundo se indica, obrigou a manter pacientes en padiolas e cadeiras de rodas nos corredores, sen condicións adecuadas para unha atención digna.
Neste contexto, BNG, Compostela Aberta, PSOE e concelleiras non adscritas expresan o seu rexeitamento á política sanitaria da Xunta e instan ao cese das medidas que, ao seu xuízo, contribúen ao desmantelamento da sanidade pública galega. A moción inclúe tamén unha demanda específica para repoñer todos os servizos e o persoal da área sanitaria de Santiago, co obxectivo de garantir unha atención axeitada á poboación.
As formacións municipais manifestan, ademais, o seu apoio ás persoas e colectivos que defenden a sanidade pública e chaman á participación na manifestación do 1 de febreiro, que cualifican como unha expresión colectiva da defensa dun sistema sanitario público, universal, equitativo e de calidade para toda a cidadanía.
