A Asociación Área Empresarial do Tambre (AAET) inaugurará este luns, 19 de xaneiro, a exposición ‘Fortes Sentires’, da artista María Fortes Blanco. O acto de apertura terá lugar ás 20:00 no Centro Empresarial do Tambre, situado no polígono do Tambre, en Santiago de Compostela.
A mostra reúne arredor dunha trintena de pezas de relevo vertical e esculturas, elaboradas mediante a técnica do ensamblaxe, ás que se suma tamén algunha obra pictórica. Trátase dun conxunto artístico construído a partir de materiais recuperados, que a autora rescata do esquecemento para convertelos en soportes expresivos cargados de significado.
Segundo explica a propia artista, a exposición nace da necesidade de transformar a súa preocupación polo malgaste de recursos naturais nunha linguaxe visual orientada á reflexión. A súa obra non parte de superficies novas, senón de obxectos e fragmentos xa usados, aos que dota dunha nova vida simbólica. “O que para moitos é residuo, para min é a materia prima dunha mensaxe de esperanza e compromiso”, sinala Fortes Blanco, quen engade que as súas creacións buscan conectar coa sensibilidade do espectador e convidar a unha ollada máis ética sobre a contorna.
En cada unha das pezas, a artista entrelaza vivencias persoais, inquietudes e desexos vinculados a unha humanidade máis consciente e respectuosa co planeta e cos seres que o habitan. A súa produción aborda así cuestións sociais e medioambientais desde unha perspectiva artística que combina reflexión, emoción e mensaxe.
Nada en Pontevedra en 1970, María Fortes Blanco iniciou a súa traxectoria artística de maneira tardía, cun perfil autodidacta e multidisciplinar. A súa formación e experiencia profesional estiveron sempre ligadas ao ámbito do deseño, un campo que marcou o seu xeito de entender a creación visual. Ao longo da súa carreira desenvolveu obras que, máis alá do valor estético, pretenden provocar unha reflexión profunda no público e promover un cambio positivo cara a modelos máis sustentables.
Un dos trazos característicos do seu traballo é a presenza dunha ironía sutil, dun humor contido e da retranca galega, elementos que funcionan como ferramentas críticas para cuestionar a relación entre a sociedade e o medio. Estas referencias conviven cunha aposta por descubrir o valor do cotián e por convidar á introspección, sen renunciar á lixeireza.
A artista conta con exposicións en París, en diversas salas de Portugal, así como en espazos expositivos de Galicia e doutras comunidades do Estado. A exposición ‘Fortes Sentires’ poderá visitarse ata o 12 de febreiro, de luns a venres, en horario de 9:00 a 14:00 e de 16:00 a 19:00. Desde a organización recoméndase avisar previamente da visita no teléfono 981 55 28 50.
