O Concello de Santiago de Compostela participou este venres no acto de presentación do entroido dos Xenerais da Ulla, celebrado en Silleda, unha cita que marcou o inicio oficial desta celebración tradicional na comarca da Ulla. No encontro estivo presente a concelleira de Festas, Pilar Lueiro, quen puxo en valor a implicación das parroquias compostelás nesta manifestación festiva.
Durante a súa intervención, Lueiro lembrou que Santiago está representado no entroido dos Xenerais da Ulla a través das parroquias de Marrozos, San Gróvio, Aríns e O Eixo, que manteñen viva esta tradición ano tras ano. A edil subliñou que se trata dunha festa “na que se pon en valor a tradición oral” e que funciona como un espazo de encontro comunitario no que o humor e a crítica popular ocupan un lugar central.
A responsable municipal de Festas destacou tamén o recoñecemento institucional acadado recentemente por este entroido, declarado Ben de Interese Cultural no ano 2025, un feito que, segundo indicou, supón “un motivo de orgullo colectivo” tanto para os territorios da Ulla como para as persoas que traballan na súa conservación e transmisión.
Desde o Concello de Santiago salientan que a participación das parroquias no entroido dos Xenerais da Ulla reforza os vínculos culturais entre a cidade e a súa contorna rural, ao tempo que contribúe á preservación dun patrimonio inmaterial baseado na oralidade, a música, a sátira e a participación veciñal.
O entroido dos Xenerais da Ulla desenvolverase nas vindeiras semanas en distintos puntos da comarca, cun calendario de desfiles e atranques nos que se combina a tradición histórica coa actualización de contidos ligados á actualidade social e política.
