O conselleiro de Educación, Ciencia, Universidades e FP, Román Rodríguez, presentou este sábado o proxecto para o cambio de cuberta do IES Plurilingüe Rosalía de Castro, en Santiago de Compostela. A intervención conta cun orzamento de case 700.000 euros e xa se atopa en fase de licitación, cun prazo de execución estimado en catro meses unha vez se inicien os traballos sobre o terreo. Segundo explicou Rodríguez, esta obra forma parte dun primeiro paquete de 16 actuacións prioritarias que a Consellería desenvolverá ao longo deste ano cun investimento global de 16 millóns de euros.
O titular de Educación salientou que os Orzamentos de 2026 destinan unha partida total de 73,6 millóns de euros para obras en centros educativos, o que supón un incremento do 4% respecto ao exercicio anterior. Dentro destas primeiras intervencións do ano na capital galega, tamén se inclúe a ampliación do IES Lamas de Abade, licitada a pasada semana por un importe de 1,4 millóns de euros. Estas actuacións forman parte do Plan de nova arquitectura pedagóxica, que eleva a máis de 12 millóns de euros o investimento total da Xunta en melloras nos centros de ensino de Santiago.
Neste momento, a cidade de Santiago conta con outras seis actuacións en marcha que suman máis de 7,7 millóns de euros. Entre elas destacan a ampliación do IES Eduardo Pondal (3 millóns), a rehabilitación integral do IES Arcebispo Xelmírez II (1,8 millóns), a reforma do Museo Pedagóxico de Galicia (500.000 euros) e o cambio de cuberta do IES A Pontepedriña (306.000 euros). O conselleiro lembrou que estas obras buscan modernizar as infraestruturas para adaptalas ás novas necesidades educativas.
No caso concreto do IES Rosalía de Castro, Román Rodríguez subliñou que a intervención será “completamente respectuosa” co edificio histórico. A nova cuberta, que ocupa unha superficie de 3.288 metros cadrados, irá atornillada á estrutura de madeira orixinal, que será reparada nos puntos onde sexa preciso, e rematada con tella curva. O proxecto tamén inclúe a instalación de novos canlóns e baixantes en todo o tellado, o cambio de catro xanelas tipo velux nos faldóns interiores do claustro e diversas tarefas de limpeza e impermeabilización.
