O Concello de Ames, a través da Concellaría de Cultura, abriu a venda de entradas para todos os espectáculos incluídos na programación do Ames Cultural correspondente ao primeiro semestre de 2026. Os billetes poden adquirirse xa mediante a billeteira electrónica municipal ou de maneira presencial nas casas da cultura de Bertamiráns e O Milladoiro o propio día de cada función, ata unha hora antes do seu inicio ou ata completar aforo.
Unha vez rematado o período de adquisición dos bonos culturais, o Concello estableceu prezos individuais a partir de 2,5 euros, cunha redución do 50% para distintos colectivos. Este desconto aplicarase a estudantes con carné, persoas maiores de 60 anos, menores de 12, familias numerosas, titulares do carné xove e persoas demandantes de emprego.
A programación do primeiro semestre arrinca este mes coa representación da obra ‘As Gardiás’, da compañía Teatro de Ningures, prevista para o 21 de xaneiro na Casa da Cultura de Bertamiráns. O calendario estenderase ata o 9 de maio, data na que se ofrecerá unha dobre representación de ‘ICTUS (anatomía de “A derradeira leición” de Castelao)’, a cargo do Grupo Chévere.
Esta última proposta forma parte do convenio de colaboración entre a Axencia Galega das Industrias Culturais e o Concello de Ames, co obxectivo de facilitar o acceso da veciñanza a producións destacadas do panorama escénico galego.
Alén da venda en liña, as entradas tamén poderán retirarse de maneira presencial no espazo no que teña lugar cada espectáculo, xa sexa na Casa da Cultura de Bertamiráns ou na Casa da Cultura do Milladoiro. As billeteiras físicas abrirán no mesmo día da representación e permanecerán operativas ata unha hora antes do comezo de cada función ou ata que se complete o aforo dispoñible.
