O Partido Popular de Santiago vén de trasladarlle ao goberno municipal de BNG e Compostela Aberta a proposta de elaborar un Rexistro municipal de familias acolledoras, coa finalidade de dar cumprimento aos compromisos aprobados en pleno nas sesións do 26 de xaneiro e do 30 de novembro de 2023.
A concelleira popular Yolanda Otero explicou que este rexistro funcionaría como unha ferramenta de apoio ás familias acolledoras e como un instrumento para reforzar a protección da infancia e da adolescencia no ámbito municipal. Segundo sinalou, permitiría identificar e apoiar ás familias dispostas a acoller menores en situación de vulnerabilidade, ao tempo que contribuiría a mellorar a oferta de acollemento familiar, garantir a seguridade dos nenos e nenas e fortalecer a coordinación entre administracións públicas e entidades sociais que traballan neste eido.
Dende o PP de Santiago lembran que o goberno local dispón de competencias en materia de protección da infancia, polo que reclaman un maior compromiso na aplicación de políticas con perspectiva de familia, incluíndo medidas específicas para a protección dos menores de idade. Otero subliñou que, na actualidade, existen nenos, nenas e adolescentes cuxos dereitos e necesidades non poden ser atendidos no seu entorno familiar de orixe, e que o acollemento familiar permite ofrecerlles coidados, apoio e seguridade grazas á implicación solidaria doutras familias.
A proposta tamén se contextualiza na conmemoración anual do Día Mundial do Acollemento Familiar, que se celebra cada mes de maio e que serve para visibilizar esta medida de protección dirixida a menores que se atopan nunha situación de especial vulnerabilidade e para os que non resulta posible ou conveniente vivir coa súa familia biolóxica.
Dende o grupo popular reclámase ao executivo local que avance na posta en marcha de medidas concretas e que desenvolva os acordos plenarios xa adoptados, coa creación dun rexistro que, ao seu xuízo, permitiría mellorar a resposta institucional ás necesidades da infancia máis vulnerable no concello de Santiago de Compostela.
