O Grupo Municipal Socialista no Concello de Santiago advertiu este venres da situación que atravesa o persoal do Servizo de Animación e Dinamización dos Centros Socioculturais, que acumula varios meses sen cobrar os seus salarios. A concelleira do PSdeG, Marta Abal, fixo pública a denuncia e sinalou que, a día 3 de xaneiro, continúan pendentes os pagamentos correspondentes aos últimos meses de 2025.
Segundo explicou Abal, as traballadoras e traballadores afectados non percibiron as nóminas desde o mes de outubro. “Estamos a 3 de xaneiro e as traballadoras e traballadores do Servizo de Animación e Dinamización dos Centros Socioculturais seguen sen cobrar as súas nóminas desde o mes de outubro”, afirmou a edil socialista.
A concelleira detallou que existen catro pagamentos pendentes, correspondentes ás mensualidades de outubro, novembro e decembro, así como á paga extraordinaria de decembro. Segundo indicou, o persoal carece de información concreta sobre cando se regularizará a situación. “Falamos de catro nóminas: outubro, novembro, decembro e a paga extra de decembro. A día de hoxe estas persoas non saben cando van cobrar, nin tan sequera saben se se lles vai pagar o que se lles debe”, sinalou.
Desde o PSdeG cualifican a situación como grave e apuntan directamente á responsabilidade do goberno municipal. Abal responsabilizou ao executivo local encabezado pola alcaldesa ‘Goretti Sanmartín‘ pola falta de solucións e pola ausencia de comunicación co persoal afectado.
“Desde o Grupo Municipal Socialista esiximos que o Concello actúe xa, que deixe de mirar para outro lado e dea información inmediata, fixando unha data concreta de pagamento e garantindo que todas as cantidades pendentes se abonarán antes de que remate o mes de xaneiro”, concluíu a concelleira.
