O Concello de Ames, a través da Concellaría de Promoción Económica, organiza este mércores, 31 de decembro, unha nova edición das prebadaladas, unha cita xa consolidada dentro da programación do Nadal en Ames e que volverá reunir na praza do Concello a veciñanza de todas as idades para despedir o ano de maneira anticipada.
O evento, que se celebra de forma ininterrompida desde o ano 2019, dará comezo ás 11:30 co reparto das bolsas de cotillón. En total, distribuiranse 1.200 bolsas, das cales 600 estarán destinadas a persoas adultas e outras 600 a público infantil. As bolsas para adultos incluirán, entre outros elementos, un vaso do Concello, un quinto de cervexa e froita, mentres que as dirixidas á cativada contarán tamén con leite, uvas de chuches e material festivo.
As prebadaladas estarán conducidas un ano máis pola artista Fátima Pego e contarán coa actuación musical do grupo galego The Crooners Band, un quinteto que interpreta versións de bandas internacionais como Pink Floyd, Toto ou U2. Durante a mañá tamén subirán ao escenario as persoas gañadoras do concurso ‘Baila con Ames 2025’, entre elas Alba Mourelle, Andrés Parga, Soraya Santos e a A&M Salsa Company.
A concelleira de Promoción Económica, Ana Belén Paz, animou á participación da veciñanza para “despedir o 2025 por adiantado e celebrar todos xuntos a entrada do novo ano nun acto divertido, familiar e cada vez máis accesible”, ao tempo que subliñou a importancia destas actividades “para dinamizar o comercio e a hostalaría local”.
APOSTA POLA ACCESIBILIDADE
Por segundo ano consecutivo, a organización volverá poñer á disposición do público o servizo de mochilas vibratorias para persoas con discapacidade auditiva. Estes dispositivos, achegados pola cooperativa Mada producións, permiten sentir a música a través da vibración e tamén son compatibles con implantes cocleares e audiófonos en posición T. Ademais, o evento contará cun intérprete de lingua de signos, co obxectivo de garantir unha experiencia inclusiva.
TARDEO E FESTA DE FIN DE ANO
A programación do 31 de decembro complétase este ano con dúas novas propostas. Pola tarde, entre as 17:00 e as 21:00, celebrarase O Tardeo na praza do Concello de Bertamiráns, unha iniciativa pensada para todos os públicos que contará con música a cargo de DJ Wana do Milladoiro e cun servizo de barra atendido por establecementos hostaleiros do municipio.
Xa de madrugada, tras as badaladas, terá lugar a Festa de Fin de Ano no pavillón polideportivo de Bertamiráns, entre a 01:00 e as 08:00. A cita contará cunha participación máxima de 870 persoas e ofrecerá servizo especial de autobuses, con dúas liñas que conectarán O Milladoiro e distintas parroquias do rural, co obxectivo de facilitar os desprazamentos e promover unha celebración segura sen saír do concello.
Desde o Concello recoméndase prestar atención á información práctica da xornada, xa que non estará permitido o acceso de vehículos ao estacionamento do pavillón, habilitándose zonas próximas para o aparcamento de coches particulares.
