O Concello de Santiago convocou para este luns, 22 de decembro, unha reunión informativa cos aloxamentos da cidade para tratar a presentación da autoliquidación e o ingreso da recarga do imposto autonómico sobre estancias turísticas. Segundo trasladou a concelleira de Turismo, Míriam Louzao, o encontro servirá para explicar o trámite administrativo necesario para realizar as autoliquidaciones do primeiro período de recadación. A cita terá lugar ás 17:00 horas no Edificio Cersia.
A ordenanza fiscal que regula esta recarga municipal foi aprobada en pleno o pasado xullo e entrou en vigor o un de outubro. Neste sentido, Louzao lembrou que o primeiro período para realizar estas autoliquidacións comprenderá desde o un ata o 20 de xaneiro de 2026.
A reunión do luns ten como obxectivo explicar de xeito práctico o procedemento que os establecementos deberán seguir a través da Sede Electrónica do Concello. Esta iniciativa enmárcase, segundo a concellería, no proceso de contraste e diálogo constante que se está a manter co sector turístico durante todo o proceso de implantación do imposto ás estancias turísticas.
