A entidade Compostela Solidaria fixo entrega dun total de 6.300 euros á Asociación Itínera Voluntarios en Saúde Mental, unha cantidade recadada a través do seu último concerto solidario e que supón o maior importe obtido ata o momento por esta iniciativa benéfica.
Segundo trasladou a organización a través das súas canles públicas, a recadación foi posible grazas á participación altruísta de diferentes músicos e músicas, así como á colaboración de empresas e ao apoio do público asistente ao evento. Desde Compostela Solidaria subliñaron a implicación colectiva que fixo posible alcanzar esta cifra, destacando o papel da cidadanía na organización e desenvolvemento da actividade.
Os fondos entregados destinaranse a apoiar o labor que realiza Itínera, unha asociación sen ánimo de lucro con sede en Santiago de Compostela, que traballa no ámbito da saúde mental desde o ano 2005. A entidade ten a súa orixe no traballo voluntario dun grupo de estudantes no Hospital Psiquiátrico de Conxo durante a década dos anos noventa, unha experiencia que marcou a súa orientación cara a modelos de intervención comunitarios e afastados da institucionalización.
Na actualidade, Itínera desenvolve programas vinculados ao lecer, a cultura, a formación, o respiro familiar, a inserción sociolaboral, a educación medioambiental e a promoción da autonomía persoal, entre outros ámbitos. Ademais, a asociación coordina tres pisos protexidos destinados a persoas con trastorno mental severo e xestiona o Centro Especial de Emprego Erit-Itínera, centrado en actividades de silvicultura, paisaxismo e mantemento de zonas verdes.
