O Monbus Obradoiro puxo en marcha un sistema para que as persoas abonadas poidan liberar o seu asento no partido fronte ao Leyma Coruña, correspondente á xornada 14 da Primeira FEB, despois de que as entradas para o encontro se esgotasen en apenas 15 minutos.
O derbi galego disputarase o 28 de decembro ás 18:00 no Multiusos Fontes do Sar e está a xerar unha elevada expectación entre a afección. A rápida venda das localidades deixou sen opción de compra a numerosos seguidores non abonados, mentres que os abonados poderán acceder ao encontro co seu abono de tempada, como no resto dos partidos do calendario.
Co obxectivo de encher a Caldeira e facilitar a asistencia doutros obradoiristas, o club activou a iniciativa ‘A Rebo-Sar’, mediante a cal os abonados que non poidan acudir ao partido poden poñer o seu asento á venda. No caso de que a entrada se venda, a persoa abonada recibirá o 50 % do importe no seu monedeiro do club.
A venda destas localidades liberadas será exclusiva para abonados do Monbus Obradoiro, garantindo así que os seguidores habituais poidan adquirir as entradas dispoñibles e acudir ao encontro cun acompañante. Os asentos iranse poñendo á venda de maneira automática a medida que sexan liberados.
Segundo explica o club, esta acción busca recoñecer a fidelidade da masa social e asegurar un ambiente plenamente obradoirista nun dos partidos máis destacados da tempada.
COMO LIBERAR O ASENTO
As persoas abonadas poden xestionar a liberación do seu asento desde a área de abonados da web oficial. Para iso, deben iniciar sesión co seu usuario e contrasinal, acceder a ‘Os meus abonos’, premer en ‘Xestionar’ no abono correspondente, seleccionar o partido contra o Leyma Coruña e escoller a opción ‘Vender entrada’. O sistema solicitará unha confirmación previa antes de completar a operación.
