O Concello de Santiago deu por rematadas e recibidas as obras de construción dunha nova praciña no cruzamento da rúa dos Loureiros coa ruela da Estila, unha actuación que permitiu reabrir ao tráfico rodado este punto desde o pasado venres. Os traballos, iniciados no mes de agosto, contaron cun orzamento de 85.615,32 euros.
A esta intervención súmase tamén a finalización da reurbanización da rúa Puente la Reina, que quedou igualmente aberta ao tráfico nos últimos días, completando así dúas actuacións recentes na zona orientadas á mellora da mobilidade e do espazo público.
O proxecto desenvolvido nos Loureiros responde á necesidade de crear un cruzamento máis seguro na confluencia desta rúa coa ruela da Estila e a ruela do Campiño do Carme, ambas de tránsito peonil. Trátase dun ámbito integrado no trazado do Colecamiños, un itinerario seguro de acceso aos centros educativos próximos, polo que a actuación supón unha mellora directa dos desprazamentos das crianzas e da seguridade peonil.
Antes da intervención, o trazado da calzada presentaba unha curva e contracurva con espazo para estacionamento, o que limitaba a visibilidade tanto das persoas que circulaban a pé como dos vehículos. Coas obras executadas, resolveuse este problema mediante a creación dunha plataforma única de preferencia peonil, pavimentada con laxas de granito.
A actuación incluíu a definición de pequenas zonas de estancia, a colocación de bancos de granito e a creación de alcouves para plantas, elementos que axudan a ordenar o paso dos vehículos e a humanizar o espazo. Ademais, plantáronse dúas árbores, que achegarán sombra durante os meses de verán e contribuirán á calidade ambiental da zona.
Os traballos completáronse con labores de mantemento do resto do pavimento da rúa, de chapacuña, permitindo a reapertura completa ao tránsito rodado unha vez finalizada a obra.
Segundo sinala o Concello, esta intervención inscríbese na liña de actuación do goberno municipal de crear espazos públicos seguros e de calidade para a veciñanza, ao tempo que se reforza o compromiso coa mobilidade de preferencia peonil e coa mellora da contorna urbana nos barrios de Santiago de Compostela.
