As concelleiras do Partido Popular de Santiago, Yolanda Otero e Nerea Barcia, mantiveron unha reunión coa Asociación de Veciños de Angrois, na que a entidade lles trasladou diferentes preocupacións relacionadas co estado dos servizos e infraestruturas da zona, cuestións que, segundo expuxeron, están a incidir de maneira directa na vida diaria da veciñanza.
Entre as principais demandas expostas figura a situación da rúa Limpadoiro, onde, segundo explicou Barcia, as veciñas e veciños levan arredor de dous anos solicitando actuacións de mellora no asfaltado. A edil indicou que estas obras foran comprometidas polo goberno municipal para o ano 2024, sen que, ata o momento, se executasen. A esta problemática engádese, segundo trasladou a asociación, a deficiente iluminación da rúa, unha circunstancia que obriga á veciñanza a empregar lanternas para desprazarse, polo que reclaman unha avaliación técnica e a instalación dun sistema de alumeado axeitado.
Durante o encontro tamén se abordou a situación da rúa Canaleto, onde, segundo os representantes veciñais, existen problemas no firme e unha falta xeral de mantemento. A asociación puxo igualmente o foco na escasa presenza policial na zona nos últimos meses, unha circunstancia que, segundo relatan, incrementa a sensación de inseguridade entre a poboación residente.
Outras das cuestións trasladadas fan referencia ás fochancas, así como ao estado de mantemento e limpeza en diferentes puntos da aldea. A veciñanza considera que esta situación require dunha resposta por parte do Concello para garantir condicións adecuadas nos espazos públicos.
Pola súa banda, Yolanda Otero sinalou que estas reclamacións poñen de manifesto a necesidade de atender as demandas do rural compostelán e insistiu en que as actuacións deben basearse na planificación e no cumprimento dos compromisos adquiridos. As concelleiras populares avanzaron que continuarán trasladando estas peticións ao goberno municipal e reclamando intervencións que dean resposta ás necesidades expostas pola veciñanza de Angrois.
