O concelleiro de Sustentabilidade Ambiental de Santiago de Compostela, Xesús Domínguez, e a concelleira de Deportes, Pilar Lueiro, participaron este sábado no inicio da plantación de 150 carballos na Alameda, unha acción promovida polo Luis Penido Team para contribuír a paliar a pegada de carbono asociada á competición automobilística. No acto estiveron tamén presentes outros membros da corporación municipal, entre eles José Ramón de la Fuente (PP), Marta Abal (PSOE) e Gonzalo Muíños (non adscrito).
A xornada comezou cunha foto institucional no Paseo dos Leóns, un dos espazos máis recoñecibles do parque compostelán, na que participou o propio vehículo de competición de Luis Penido. A continuación, o acto trasladouse á zona da carballeira da Alameda, onde se realizou o xesto simbólico que marcou o inicio da plantación. Concello e equipo deportivo aliáronse así nunha acción conxunta orientada á mellora da calidade ambiental e á compensación do impacto da actividade automobilística.
Entre os momentos destacados da iniciativa estivo a plantación dun carballo a cargo de Concha e Aniceto, unha parella chegada desde Lugo que celebra 60 anos de matrimonio e que participou na actividade acompañando ao seu fillo, amigo persoal do piloto compostelán.
Esta acción ambiental chega semanas despois de que a alcaldesa de Santiago, Goretti Sanmartín, e membros da Corporación Municipal recibisen no Pazo de Raxoi a Luis Penido tras proclamarse campión de Europa do grupo 5 do “FIA European Hillclimb Championship”. No encontro institucional tamén participou o director deportivo do Luis Penido Rally Team, Daniel Blanco.
Desde o Concello de Santiago reiterouse o apoio á traxectoria deportiva do equipo compostelán, que compite ao máis alto nivel internacional. A concelleira de Deportes, Pilar Lueiro, subliñou que “falar de Luis Penido é falar de deporte, de automobilismo e falar de promoción da nosa cidade, polo tanto, é falar de poñer Santiago no mapa internacional”.
