O Centro de Congresos e Exposicións Lienzo Norte, na cidade de Ávila, converteuse este sábado no punto de encontro das Cidades Patrimonio da Humanidade para conmemorar os corenta anos da súa primeira declaración pola Unesco. O aniversario lembra o recoñecemento simultáneo, en decembro de 1985, dos cascos históricos de Santiago de Compostela, Segovia e Ávila, que abriron posteriormente o camiño á creación do actual grupo de quince cidades.
Ao acto asistiron representantes municipais das localidades que integran a asociación, entre eles a alcaldesa de Santiago de Compostela, Goretti Sanmartín, que compartiu escenario cos alcaldes de Ávila, Segovia, Salamanca e Toledo, ademais de concelleiros doutros municipios. A Sala Sinfónica reuniu autoridades e público nun evento que combinou intervencións institucionais cun programa musical e teatral no que participaron formacións das tres cidades protagonistas da efeméride.
A celebración incluíu actuacións da soprano Estela Araceli Vicente Díaz e da pianista Bohdan Syroyid, do Orfeón Terra a Nosa —dirixido por Luis Martínez, con Juan Manuel Varela ao piano— e da Escolanía de Segovia xunto coa Orquesta Sinfónica de Segovia, que presentaron a obra El misterioso asesinato del tosedor de conciertos baixo a dirección escénica de Alberto Sagredo.
Antes do inicio do espectáculo, os alcaldes e alcaldesa de Ávila, Santiago e Segovia subliñaron o significado do título Unesco como mandato compartido de preservación e divulgación do patrimonio. O alcalde anfitrión, Jesús Manuel Sánchez Cabrera, lembrou a responsabilidade cidadá na conservación dos bens culturais e expresou o desexo de que esta conmemoración marque “un novo capítulo de traballo conxunto” entre as cidades.
No mesmo sentido, Goretti Sanmartín apuntou que Compostela “continúa afrontando retos decisivos para garantir a súa continuidade como Cidade Histórica viva”. Referiuse á necesidade de protexer a autenticidade do centro histórico, manter o tecido social e comercial, equilibrar o uso turístico coa vida cotiá, avanzar na loita contra o cambio climático e mellorar a habitabilidade e o dereito ao descanso. Para a rexedora, estes desafíos son parte esencial da responsabilidade que implica manter o recoñecemento internacional.
O presidente do Grupo de Cidades Patrimonio da Humanidade e alcalde de Segovia, José Mazarías, definiu as tres cidades declaradas en 1985 como “irmás xemelgas” e destacou que a familia medrou ata quince integrantes. Defendeu tamén o carácter “compacto” da entidade, que traballa de maneira coordinada para promover e protexer o patrimonio histórico e cultural común, así como para procurar respostas aos retos que comparten.
