A alcaldesa de Santiago, Goretti Sanmartín, trasladou este mércores que o Goberno local mantén como horizonte o próximo pleno municipal para elevar a proposta de modificación da taxa do lixo, aínda pendente de negociación co PSOE e co grupo das concelleiras non adscritas. Segundo explicou, o Executivo está “á espera de que poida haber un feedback” por parte destes grupos para incorporar achegas ou suxestións que permitan alcanzar un acordo suficiente para a súa aprobación.
Sanmartín apuntou que xa mantivo contactos previos co resto da corporación, pero que estes solicitaron tempo adicional para fixar unha posición común. “Necesitan un tempo para poder chegar a un acordo e estamos dispostos a dar ese tempo”, indicou, confiando en que a proposta poida quedar lista para ser sometida a debate e votación na próxima sesión ordinaria.
A rexedora lembrou que a actualización da taxa é unha obrigación marcada pola normativa vixente, ao tempo que considerou imprescindible adecuar o tributo ao incremento de custos derivado do ‘taxazo’ de Sogama, que segundo subliñou ten “conclusións económicas importantes” para o Concello. O Goberno municipal mantén así aberto o diálogo político, á espera das aportacións que poidan trasladar PSOE e non adscritas para desbloquear a tramitación.
