O Concello de Santiago confirmou hoxe, 20 de novembro, data na que se cumpren 50 anos da morte de Francisco Franco, a volta das dúas estatuas do Pórtico da Gloria que permanecían no Pazo de Meirás. A alcaldesa, Goretti Sanmartín, anunciou que as pezas chegarán á cidade o 11 de decembro, día no que quedarán instaladas no Museo do Pobo Galego, institución que acollerá a súa exhibición pública.
A rexedora subliñou que o traslado non é só “a recuperación de dúas obras de arte”, senón “un acto de xustiza histórica e de dignidade colectiva”, lembrando que as esculturas “foron vítimas dun expolio e dunha apropiación indebida”. Sanmartín enmarcou o anuncio nunha xornada “magnífica para a cidade”, destacando o valor simbólico do regreso das pezas a Santiago.
Durante a súa intervención, quixo recoñecer o labor desenvolvido ao longo de anos por especialistas e institucións que impulsaron a recuperación. A alcaldesa agradeceu o traballo de “xuristas, historiadores e historiadoras, persoal da administración e representantes das corporacións municipais anteriores”, así como o compromiso “moi especial da xente activista da memoria”.
O Concello cualificou o 11 de decembro como “un día histórico para Galicia”, e o Museo do Pobo Galego abrirá as súas portas para celebrar o regreso das esculturas xunto á cidadanía. Sanmartín convidou a veciñanza a anotar a data e participar na xornada, animando a acudir para “contemplar as estatuas e facer ese exercicio de memoria histórica”.
