O programa Apego do Concello de Ames mantén activa a súa oferta de actividades para a primeira infancia nestes meses de outono e convoca para o venres 28 de novembro, ás 18:00, unha nova proposta en Bertamiráns. Trátase da sesión de contos ‘Alfabeto Castelao’, que terá lugar no Pazo da Peregrina e que correrá a cargo da narradora Soledad Felloza, á que desde a organización presentan como “unha das mellores contadoras do país”.
Con esta actividade, o programa insírese na conmemoración do Ano Castelao, ofrecendo unha achega específica para o público infantil e familiar. A sesión está dirixida a familias con crianzas a partir de 3 anos e será de balde, mais require inscrición previa. A proposta enmárcase na liña de traballo de ‘Apego’, que procura reforzar os espazos de socialización en galego desde as idades máis temperás.
Segundo explica o Concello, ao longo da tarde tecerase “un camiño cheo de historias, emocións e contos” que servirá para acompañar ás familias no universo creativo e humano de Castelao, figura central da cultura galega contemporánea. A través dun enfoque lúdico, búscase que as crianzas se acheguen á súa obra e ao seu pensamento, poñendo no centro a lingua galega e a importancia de difundir a cultura propia entre as novas xeracións.
O prazo de inscrición permanece aberto desde este xoves 20 de novembro e rematará o xoves 27. As persoas interesadas en participar deberán remitir un correo electrónico a normalizacion@concellodeames.gal, indicando nome e apelidos das persoas asistentes, idade das crianzas e teléfono de contacto. Desde o Servizo de Normalización Lingüística lembran que non se admitirán solicitudes fóra de prazo e que as prazas se irán asignando por orde de recepción das inscricións.
Ademais desta sesión, o proxecto Apego continúa a ofrecer nestes derradeiros meses do ano diferentes propostas lúdicas en galego para a infancia, co obxectivo de acompañar ás familias no proceso de transmisión da lingua. O programa vai dirixido ás que están a agardar un bebé ou teñen crianzas de entre 0 e 6 anos, e combina accións formativas, materiais específicos e actividades de ocio compartido.
As familias que desexen sumarse de maneira máis estable ao programa poden facelo a través do Servizo de Normalización Lingüística de Ames, ben escribindo ao mesmo enderezo normalizacion@concellodeames.gal, ben chamando ao teléfono 662 377 215. Tamén é posible adherirse cubrindo o formulario ‘Súmate ao apego’, dispoñible na páxina web apego.gal, desde onde se ofrece información xeral, recursos e novidades sobre este proxecto colaborativo de dinamización lingüística.
