O Centro de Estudos Avanzados da USC acolleu a presentación do proxecto ‘Actitudes de xénero detectadas polo estudantado de Enfermaría nas prácticas clínicas’, unha investigación que analiza o impacto dos micromachismos e condutas sexistas na formación sanitaria. O traballo, realizado con apoio dunha axuda da Universidade no marco do Pacto de Estado contra a Violencia de Xénero 2025, baseouse nunha enquisa a 428 estudantes das tres universidades públicas galegas, das que o 84 % eran mulleres.
As conclusións mostran que o alumnado feminino é o principal obxectivo dos comportamentos machistas, especialmente en forma de infantilización (50 %), asignación de tarefas consideradas inferiores (57,5 %) e infravaloración do traballo (52,7 %). Tamén se detectaron comentarios ou “bromas” despectivas sobre as capacidades das mulleres, que adoitan proceder de homes doentes, acompañantes ou persoal sanitario.
O estudo recolle ademais que un 13 % das persoas enquisadas afirma ter sufrido contacto físico non consentido ou insinuacións de carácter sexual, condutas atribuídas maioritariamente —nun 93 % dos casos— a doentes ou acompañantes masculinos. Aínda así, estas situacións raramente se comunican ás persoas responsables das prácticas, segundo sinala o informe, e non adoitan ter consecuencias para quen as provoca.
Outro dos aspectos salientados é a percepción de desigualdades nas valoracións académicas e no trato recibido, que a metade do alumnado vincula a cuestións como o sexo, a aparencia física ou a orientación sexual. O estudo conclúe que o xénero masculino, un físico axustado aos cánones estéticos e unha orientación heteronormativa asócianse cun mellor trato e con cualificacións máis altas.
A presentación da investigación contou coa participación das súas autoras e foi inaugurada pola delegada do reitor para a Igualdade, Sonia Rodríguez Boente, quen destacou a importancia de “identificar e visibilizar estas situacións” para avanzar cara a contornas universitarias libres de discriminación.
