O Consorcio de Santiago presentou este xoves 6 de novembro na Casa das Asociacións de Cornes a reimpresión do libro Historias do Carril-Cornes, do escritor Xoán Luís Miguéns García, dentro da Biblioteca de Divulgación da entidade. A nova edición coincide co centenario da anexión do antigo Concello de Conxo ao de Santiago de Compostela, celebrada neste 2025.
No acto participaron, ademais do autor, o xerente do Consorcio, José Antonio Domínguez Varela; o autor do prólogo, Carlos Abellán Ruiz; e o responsable de publicacións, Juan Conde Roa, quen destacaron o valor divulgativo do volume e a súa conexión coa memoria ferroviaria e social da cidade.
A publicación reúne vinte e catro relatos inspirados en feitos e personaxes ligados ao primeiro camiño de ferro galego, que uniu Santiago de Compostela co mar de Arousa. Miguéns recrea historias de ferroviarios, viaxeiros e veciños vencellados a aquel tren pioneiro, abordando episodios que van desde o contrabando de penicilina ata a catástrofe de Pazos de 1952.
Os textos, de extensión e ton variados, permiten entrever a evolución do mundo ferroviario galego entre o século XIX e boa parte do XX, cun enfoque que combina memoria persoal e documentación histórica.
Nado en Vilagarcía de Arousa, Xoán Luís Miguéns desenvolveu máis de corenta anos de traxectoria profesional no sector ferroviario, experiencia que lle serviu de base para reflectir en Historias do Carril-Cornes o peso simbólico e humano do tren na historia recente de Galicia.
