A presenza dunha espesa escuma branca nas augas do río Sar, ao seu paso polo paseo fluvial de Bertamiráns, volveu espertar a alarma entre os veciños de Ames, que relacionan o episodio coas verteduras rexistradas en outubro durante as obras da depuradora de Silvouta. Porén, tanto a sociedade estatal Acuaes como o Concello de Santiago negan que o episodio teña relación coa instalación.
Nun comunicado remitido pola Subdelegación do Goberno na Coruña, Acuaes asegurou que “o vertido non procede da depuradora de Silvouta, que funciona con normalidade tras as incidencias rexistradas días atrás a consecuencia dos sedimentos acumulados durante anos nos colectores existentes”. A entidade destacou ademais que, grazas ás medidas adoptadas, non se produciron novos vertidos incontrolados ao río.
Pola súa banda, o Concello de Santiago confirmou tamén que non se detectaron novas incidencias nas obras da nova estación depuradora e que tanto Acuaes como Augas de Galicia comunicaron que non lles consta ningún incidente recente. O Goberno local indicou que se mantén “en permanente contacto coa entidade que desenvolve os traballos” para seguir a evolución da situación.
Mentres tanto, os residentes de Bertamiráns expresaron a súa preocupación ante algúns medios de comunicación, describindo unha escuma “semellante á do deterxente” acumulada á altura do muíño de Entrerríos, sobre unhas augas que, segundo lembran, “aínda non se recuperaron da vertedura de outubro”. “Era imposible vir por aquí, o cheiro era insoportable”, recordan.
A veciñanza reclama medidas urxentes e duradeiras para frear o que consideran un problema crónico de contaminación do Sar. “A porcallada toda de Santiago vén para aquí. É o río máis contaminado de Europa”, lamentan.
