O Concello de Santiago convocou para o 10 de novembro unha reunión coa decena de asociacións veciñais da cidade histórica co obxectivo de explicarlles os detalles da modificación puntual da regulación de usos do Plan especial de protección e rehabilitación da cidade histórica (PE-1). O encontro contará coa participación do concelleiro de Urbanismo, Iago Lestegás, e de persoal técnico municipal, que ofrecerán unha exposición sobre os cambios introducidos e atenderán as cuestións que poidan formular as directivas das entidades veciñais.
A Concellería de Urbanismo remitiu xa unha comunicación oficial a todas as persoas titulares de inmobles situados no ámbito do PE-1, informando da aprobación inicial da modificación e do correspondente período de exposición pública. Segundo o goberno local, esta xuntanza forma parte dunha liña de interlocución directa coa veciñanza para garantir a transparencia e o diálogo arredor das actuacións urbanísticas.
A reforma aprobada inicialmente no mes de xuño ten como finalidade reforzar o uso residencial tradicional da cidade histórica e protexer o comercio de proximidade, ao tempo que busca equilibrar os usos orientados a residentes e turistas. Tamén facilita a implantación de novos usos dinamizadores e introduce axustes nas condicións de agrupación e división de vivendas, co fin de adaptar o parque residencial ás necesidades actuais dos fogares.
O Concello destaca que esta modificación converte Santiago nun municipio “pioneiro” na defensa do comercio local dentro dun plan urbanístico de protección patrimonial. A documentación completa, incluída a información xeorreferenciada, pode consultarse no Xeoportal municipal (Xeoportal > Urbanismo > Modificación PE1 en trámite), ademais de en formato físico na sede da Concellería de Urbanismo (Casas Reais, 8).
Esta reunión enmárcase na mesma dinámica de participación que levou recentemente á alcaldesa Goretti Sanmartín e aos concelleiros de Urbanismo, Iago Lestegás, de Vías e Obras, Xesús Domínguez, e de Rural e Relacións Veciñais, Pilar Lueiro, a manter un encontro coa veciñanza da Sabugueira para explicar o avance do Plan especial director de ordenación e rehabilitación do Camiño Francés (PE-3).
