Os coñecidos divulgadores culturais Miguel Ángel Cajigal Vera, máis coñecido como ‘El Barroquista’, e Sara Rubayo, ‘La gata verde’, visitarán Santiago o próximo xoves día 6 para gravar un podcast en directo dende a Igrexa da Universidade.
O acto, que forma parte da programación do Outono Cultural da USC, comezará ás 20:30 horas e será aberto ao público ata completar aforo. Trátase dunha das propostas máis esperadas do ciclo, ao reunir a dous dos principais nomes da divulgación artística e histórica en redes sociais e medios dixitais.
As entradas gratuítas, cun máximo de dúas por persoa, poderán recollerse o mesmo día da gravación a partir das 20:00 horas, mentres que a apertura de portas está prevista para as 20:15 horas.
A actividade ofrecerá unha oportunidade para gozar en vivo do diálogo entre Cajigal e Rubayo, dous profesionais que comparten o obxectivo de achegar a historia da arte a novos públicos mediante formatos accesibles e actuais. O evento enmárcase na aposta da USC por integrar a cultura contemporánea e a divulgación científica na vida universitaria e na programación aberta á cidadanía compostelá.
