Bombeiros de Santiago advertiron de que este venres se volverá a repetir a situación que o parque xa viviu o pasado luns, con persoal por baixo dos mínimos requiridos, o que o deixará “inoperativo” desde as 22.00 horas desta noite ata 24 horas despois.
Segundo recolle un comunicado difundido en ‘Instagram’ polos traballadores, a quenda desta xornada só contará con catro bombeiros e un xefe do equipo de garda, en lugar do nove efectivos que require a quenda mínima. “Con esta dotación, o parque permanece inoperativo polos seus propios medios, obrigando a solicitar apoio ao 112 para que mobilice parques doutros concellos ante emerxencias”, expoñen.
Deste xeito, lamentan que Santiago “non poida garantir” a resposta “inmediata” ante un incendio, accidente ou rescate: “Os bombeiros de Santiago seguimos cumprindo coa nosa responsabilidade e servindo aos veciños con profesionalidade e entrega, pero non podemos facer máis con menos”.
Esta circunstancia, que vén de atrás, levaba aos bombeiros a reforzar as quendas a través das horas extra. Con todo, dado o atraso no seu cobro, deixaron de facelas, unha medida que tamén decidiron adoptar axentes da Policía Local tras unha reunión celebrada na noite do mércores.
NEGOCIACIÓNS
A decisión da Policía Local, ademais, ten lugar despois de que o goberno local e as organizacións sindicais CCOO, UGT e CIG acordasen na xornada do mércores canalizar as conversacións sobre as reivindicacións de ambos os corpos a través dunha mesa de negociación. Fontes sindicais lembraron que agora se debe acordar unha orde do día para a celebración desta semana, así como unha data para a súa celebración.
