O auditorio da Casa da Cultura do Milladoiro acollerá o xoves 6 de novembro, ás 19:30, a charla ‘Como salvar unha vida’, unha iniciativa da Asociación Galega de Afectados por Transplantes Medulares e Enfermidades Oncohematolóxicas (Asotrame) coa colaboración do Concello de Ames. A sesión busca informar sobre o cancro hematolóxico e fomentar a doazón de medula ósea, ademais de desmontar os mitos e falsas crenzas arredor deste proceso.
Durante o encontro intervirá Alba García, traballadora social da entidade, quen explicará en que consisten as doenzas hematolóxicas como as leucemias ou linfomas, así como o impacto que teñen no ámbito persoal e familiar. Ademais, un expaciente transplantado de medula compartirá a súa experiencia para visibilizar a importancia deste xesto solidario, que pode salvar vidas cando outros tratamentos non funcionan.
A charla enmárcase no programa ‘Sensibilización e solidariedade’, financiado polo Concello de Ames a través das axudas municipais a entidades sociais sen ánimo de lucro. O ciclo incluirá outras accións divulgativas en centros educativos, co obxectivo de concienciar á mocidade, xa que é posible rexistrarse como doante de medula entre os 18 e os 40 anos.
Así, o venres 7 de novembro realizarase unha sesión co alumnado de 5º de primaria do CEIP Agro do Muíño, mentres que o martes 11 de novembro será a quenda dos estudantes de 3º da ESO do IES do Milladoiro. A través destas actividades, Asotrame e o Concello buscan promover a empatía, o coñecemento científico e a solidariedade interxeracional, abrindo espazos de diálogo sobre a saúde e o apoio comunitario.
