O coordinador local de UCIN Santiago, Diego Adrián Mallo Cao, manifestou este sábado o seu “profundo pesar” polo sacrificio do can Gosu, realizado esta semana no Refuxio de Bando, e denunciou a “complicidade” de todas as forzas políticas representadas no Padroado municipal —BNG, PSOE, Compostela Aberta e Partido Popular— na decisión adoptada.
Segundo Mallo Cao, “Gosu merecía unha segunda oportunidade. O que se fixo con el non é protección animal, é abandono institucional e cobardía política”. O responsable de UCIN lamentou tamén a falta de transparencia e diálogo coa cidadanía por parte do Concello de Santiago e do propio Padroado, ao entender que o proceso de decisión “non contou coa información nin coa participación pública necesarias”.
CRÍTICAS AO MODELO DE XESTIÓN
Desde UCIN Santiago consideran que o caso de Gosu “representa o fracaso dun sistema municipal que presume de animalista pero actúa con desinterese e frialdade”. A formación asegura que, mentres centos de veciños reclamaban alternativas, como a rehabilitación, a adopción controlada ou a intervención de profesionais especializados, o Concello “optou pola vía máis doada: a eutanasia”.
“Ningún dos partidos con representación no Concello moveu un dedo para salvar a este animal. Todos miraron cara outro lado, e hoxe a cidade perde algo máis que un can: perde humanidade”, afirmou o coordinador local.
UCIN Santiago pide que se abra unha investigación sobre o proceso que levou ao sacrificio do animal, así como a publicación íntegra dos informes veterinarios que sustentaron a decisión. Ademais, propón a creación dun novo modelo de xestión ética no Refuxio de Bando, que inclúa participación cidadá e programas de recuperación canina con base profesional e psicolóxica.
A formación independente defende que a protección animal non debe depender de intereses políticos e comprométese a impulsar no futuro un refuxio municipal con xestión integral e enfoque educativo, no que o sacrificio “non sexa nunca a primeira opción”.
