A conselleira de Medio Ambiente e Cambio Climático, Ángeles Vázquez, trasladou ao alcalde de Ames, Blas García, as actuacións emprendidas pola Xunta de Galicia tras detectar a vertedura ao río Sar atribuída ás obras da depuradora da Silvouta, en Santiago. Na súa resposta a unha carta remitida polo rexedor o pasado 17 de outubro, a titular autonómica informou de que Augas de Galicia activou un seguimento exhaustivo da situación mediante inspeccións diarias desde o día 12.
Segundo a conselleira, as inspeccións revelaron que non se estaban a cumprir correctamente os protocolos de posta en marcha da nova Edar, o que provocou que parte das augas residuais fosen vertidas sen tratamento adecuado. A Administración autonómica asegura que, malia os primeiros avisos recibidos hai unha semana, non foi ata este martes cando se activou un proceso físico-químico alternativo para substituír parcialmente o tratamento biolóxico previsto.
Ante esta situación, Augas de Galicia requiriu á promotora da infraestrutura, Acuaes, e ao Concello de Santiago, titular da autorización de vertedura, a elaboración inmediata dun plan de continxencia que garanta o cumprimento da normativa ambiental e evite novos episodios contaminantes. Ademais, abriuse un expediente para determinar responsabilidades e posibles sancións, incluíndo a obriga de restaurar o tramo afectado do Sar.
A conselleira indicou tamén que, en función das conclusións desa investigación, se esixirá ao responsable do episodio contaminante un plan de restauración ambiental supervisado por Augas de Galicia e coordinado cos concellos implicados, entre eles Ames.
No mesmo escrito, Ángeles Vázquez lembrou ao alcalde que Ames e Brión comparten unha depuradora que tamén verte ao Sar, augas abaixo da de Santiago, e que acumula incumprimentos recorrentes nos parámetros de depuración. Por iso, pediu a todas as administracións con competencias nesta materia que adopten medidas para garantir o correcto funcionamento das instalacións, co obxectivo de mellorar conxuntamente a calidade das augas do río Sar.
