Un incendio rexistrado arredor das 04:20 da madrugada deste mércores nas Brañas de Sar deixou unha furgoneta completamente calcinada e provocou danos noutros cinco vehículos estacionados na zona. O lume declarouse nun espazo sen habilitar para o aparcamento, próximo á pista que une Clara Campoamor con Sar, segundo confirmaron fontes policiais, preto da Estación Intermodal.
A Policía Nacional e os servizos de bombeiros apuntan a que o suceso puido ser intencionado, xa que a furgoneta afectada presentaba signos de manipulación e algúns dos coches próximos tiñan cristais rotos e danos na carrocería. A investigación permanece aberta para determinar a autoría e as circunstancias do incendio.
Malia producirse nunha zona con abundante vexetación, a choiva caída nas últimas horas evitou a propagación das lapas cara ao entorno natural. Non houbo que lamentar danos persoais.
TRASLADO DOS BOMBEIROS A PICAÑOS
Pouco despois de intervir nas Brañas de Sar, os bombeiros tiveron que desprazarse de urxencia ata Picaños, onde se declarou outro lume nun galpón situado preto de vivendas.
Segundo informaron fontes do servizo de emerxencias, o incendio afectou a unha construción empregada como almacén de ferramentas e útiles agrícolas, o que incrementou o risco pola presenza de materiais inflamables.
O operativo conseguiu controlar as lapas sen danos persoais nin estruturais graves, aínda que se investigan as causas do suceso. As primeiras hipóteses apuntan a un posible curtocircuíto ou subida de tensión eléctrica, sen indicios de intencionalidade.
