A localidade de Bertamiráns acolleu este domingo unha nova edición da Carreira Pedestre Popular do Concello de Ames, que volveu converterse nunha gran festa deportiva a pesar da choiva persistente. Preto de 1.500 corredores e corredoras participaron nunha xornada que combinou deporte, convivencia e espírito popular, enmarcada no XI Circuíto Provincial de Carreiras Populares da Deputación da Coruña.
Na proba absoluta de 10 quilómetros, o vencedor foi Iván Puentes Barcía, do Club Atletismo Narón, cun tempo de 30:42, seguido polo seu compañeiro Pedro Liste Monteagudo (31:20) e por Alejandro Fernández Rivera (31:32). Na categoría feminina, o triunfo correspondeu a Andrea Iglesias Carballido, do Athletics San Lázaro, que completou o percorrido en 40:04. Patricie Viadel Turjanicová (Atletismo Santiago) e Paula González Gómez (La Cerezal Team) ocuparon a segunda e terceira praza, respectivamente.
Na clasificación local, os mellores tempos masculinos foron para Pablo Díaz Oíza (33:26), Modesto Rouco Almuíña (37:03) e Luis Miguel Feito Mirás (37:24). En mulleres, destacaron Marinela Mayo Caamaño (43:18), Shaila Muñiz Pérez (45:30) e Maica Viaño Nieto (49:07). O Club Atletismo Sar proclamouse gañador por equipos, seguido do Club Tríatlon Compostela e o Noitebra.
De xeito paralelo celebrouse o Campionato de España máster 5K, no que Ignacio García Ramón (Adas Cupa, máster 35) se impuxo na categoría masculina cun rexistro de 15:28, mentres que María Isabel Ferrer Castell (C.A. Llebeig, máster 40) foi a máis rápida en mulleres, con 17:42.
O atleta amesán José Fernando Sainz García, do Atletismo Sar, acadou o título nacional máster 75, establecendo un novo récord de España cun tempo de 22:11. Pola súa banda, o tamén amesán Jorge Crespo Arias proclamouse campión de España máster 45 cunha marca de 15:43.
Na categoría sub18, os gañadores foron Uxío Rudiño Lorenzo (Atletismo Negreira) e María Estévez Vázquez (Sociedade Gimnástica de Pontevedra), completando un percorrido de 5,25 quilómetros. A atleta local Mariela Quijano Fernández (Ames Atletismo Savante) obtivo a cuarta posición.
A entrega de trofeos tivo lugar na praza do Concello, onde se recoñeceu aos tres primeiros clasificados de cada categoría e aos mellores corredores empadroados en Ames. Ademais dos trofeos e medallas, outorgáronse premios en metálico aos catro primeiros postos da proba absoluta e aos clubs gañadores. A empresa BeOne A Telleira agasallou cun vale de tres meses de ximnasio aos primeiros atletas locais en cruzar a meta.
O evento contou coa organización do Concello de Ames e a Federación Galega de Atletismo, coa colaboración dos clubs locais MillaRaio, Sar e Ames Atletismo, así como da Policía Local, Protección Civil e o Club Ciclista Os Esfola Arrós, encargados do dispositivo de seguridade e acompañamento. O Comité de Xuíces da Delegación de Santiago supervisou o desenvolvemento da proba, que transcendeu con normalidade e consolidou a carreira amesá como unha das citas máis destacadas do calendario atlético galego.
