A Policía Local de Santiago informou de que un operativo especial que activou na noite do venres 10 ao sábado por mor dunha concentración de vehículos no Polígono da Sionlla, saldouse cunhas 150 denuncias. Houbo 98 por excesos de velocidade e 51 por infraccións administrativas –a maioría por accións de ‘tuning‘ sen homologación–. Outras cursáronse por faltas de respecto e consideración.
A Policía Local de Santiago de Compostela tivo coñecemento de que se realizou unha convocatoria a través das redes sociais para unha macroconcentración de vehículos para o venres 10 de outubro ás 23.00 horas no polígono industrial da Sionlla. Ante a posibilidade de que a convocatoria puidese contar coa afluencia dun número elevado de vehículos e de persoas e en previsión de posibles incidentes deseñouse un dispositivo especial de control para a dita concentración.
REFORMAS EN VEHÍCULOS SEN HOMOLOGAR
No dispositivo participaron un número importante de axentes que pecharon ao tráfico varias rúas do polígono obrigando así os vehículos que acudían á concentración a circular pola zona onde se estableceron os oportunos controis. Pasado este filtro, os vehículos tiñan que ir abandonando o parque empresarial da Sionlla.
En total, controláronse 450 vehículos e os axentes impuxeron 98 denuncias por exceder a velocidade permitida en distintos puntos de control e 51 denuncias por infraccións administrativas, a gran maioría delas por realizar reformas de importancia nos vehículos sen contar coa correspondente homologación.
