Dúas persoas tiveron que ser excarceradas na tarde deste domingo despois de que o coche no que viaxaban se saíse da vía e impactase contra un dos alicerces dun paso elevado da SC-20 ao seu paso por San Lázaro.
Segundo informou o 112 Galicia, o sinistro produciuse pasados uns minutos das 18:00, momento no que varios particulares alertaron á central de emerxencias de que os ocupantes do turismo non podían saír polos seus propios medios.
De inmediato mobilizáronse o 061, os Bombeiros de Santiago e a Policía Local, que se desprazaron ata o lugar. Os bombeiros empregaron ferramentas de excarceración para liberar ás dúas persoas atrapadas no interior do vehículo.
Unha vez rescatadas, ambas foron atendidas polos profesionais sanitarios e trasladadas en ambulancia ao hospital de referencia para continuar coa atención médica.
