O secretario xeral de Emprego e Relacións Laborais, Pablo Fernández, visitou este martes o viveiro empresarial da Cámara de Comercio de Santiago para coñecer as iniciativas que a entidade leva a cabo no fomento do emprendemento. Durante a súa intervención, subliñou que a promoción de novos proxectos empresariais encaixa coa estratexia da Xunta para consolidar un modelo de emprendemento ligado ao territorio, apoiado a través da Rede de polos de emprendemento, con 15 oficinas en Galicia que xa atenderon máis de 4.700 proxectos.
A secretaria xeral da Cámara, Rosa Cardeso, puxo en valor o traballo realizado pola institución compostelá, con especial referencia aos seus espazos de incubación e aceleración de proxectos, como o Biopolo da Sionlla, o Coworking Dixital Compostela ou o propio Viveiro de Empresas, que figura no top 3 do ranking estatal elaborado pola Fundación das Caixas de Aforros (Funcas). Recordou que só no último ano a Cámara atendeu preto de 500 solicitudes de asesoramento, das que xurdiron máis de 150 novas empresas.
Cardeso incidiu tamén na importancia de manter unha colaboración estreita coa Secretaría Xeral de Emprego para impulsar novos programas que reforcen a cultura emprendedora e consoliden o tecido empresarial existente.
Pola súa parte, Fernández lembrou que Galicia foi recoñecida como Rexión Emprendedora Europea 2025 e destacou que este ano o Goberno galego destina 32 millóns de euros a reforzar o ecosistema emprendedor. Neste sentido, salientou a necesidade de aproveitar o talento interno e de favorecer o retorno dos galegos e galegas do exterior que desexen desenvolver os seus proxectos de negocio na comunidade.
