O Concello de Ames deu un novo paso no seu plan de mellora viaria ao aprobar a licitación dun proxecto de pavimentación en Bertamiráns e Ortoño, cun orzamento base de 147.363,33 euros financiado a través do POS+ 2025.
Segundo explicou o concelleiro de Obras e Servizos Básicos, Gustavo Nieto, a iniciativa forma parte dun paquete máis amplo de proxectos municipais incluídos no POS principal, que suman 1.073.870 euros. No caso agora aprobado, actuará en tres rúas do núcleo urbano de Bertamiráns —Rueiro, Telleira e un treito do camiño do Rueiro dende a avenida da Peregrina—, así como no viario que conecta A Condomiña con Punxeiras, na parroquia de Ortoño.
A intervención máis destacada será a remodelación da rúa Telleira, onde se ampliarán as beirarrúas ata dous metros, transformarase o viario en sentido único con carril de tres metros e zonas de estacionamento regulado, e instalarase nova iluminación pública. Tamén se construirá unha isleta peonil, dous pasos de peóns —un deles sobreelevado— e adaptarase a rede de pluviais.
Na rúa Rueiro, o proxecto prevé a renovación da capa de rodaxe nas zonas máis deterioradas, a sinalización horizontal completa e a instalación de seis elementos redutores de velocidade e catro sinais verticais.
O camiño do Rueiro contará cunha nova capa de pavimento nun treito de 80 metros desde a avenida da Peregrina, coa correspondente sinalización horizontal e vertical.
Por último, o viario que une A Condomiña con Punxeiras será pavimentado ao longo de 225 metros, con reparación de fochancas, limpeza de gabias, pintado de marcas viarias e a renovación dun sinal de stop.
Nieto destacou que “é importante o mantemento e acondicionamento das rúas urbanas e dos camiños do rural” e lembrou que estas actuacións se enmarcan no plan de mellora das infraestruturas municipais sufragado pola Achega provincial do POS+ 2025, que destina a Ames 747.709,95 euros.
