O Concello de Santiago está a desenvolver este verán un plan de reparación e renovación do pavimento de chapacuñaen diferentes puntos do centro histórico e da súa contorna. O obxectivo é conservar este elemento tradicional do viario compostelán, ao tempo que se mellora a seguridade e a accesibilidade dos espazos públicos.
Os traballos xa se completaron na rúa de Tras Santa Clara e na rúa do Hospitaliño, onde se interveu entre o 4 e o 8 de agosto. Actualmente, as actuacións céntranse na avenida de Coimbra —programada do 18 ao 25 de agosto—, así como na rúa da Chaparra e na rúa da Angustia. A seguinte fase arrancará esta mesma semana na rúa do Rosario.
Tamén están previstas intervencións nas rúas de Bonaval e dos Loureiros. Neste último caso, a reparación do pavimento desenvolverase de maneira coordinada coas obras do paso de peóns, que obrigarán a cortar o tráfico o 22 de agosto. O prazo de execución desta actuación será de dous meses.
O concelleiro de Obras, Xesús Domínguez, explicou que “estas actuacións forman parte dun plan continuo de coidado e mellora do espazo público, co obxectivo de facilitar a mobilidade, garantir a seguridade viaria e preservar o carácter histórico das nosas rúas”. Engadiu, ademais, que se procura minimizar as molestias á veciñanza mediante unha planificación axustada aos meses de verán e cun diálogo constante cos residentes.
Este plan de mantemento permite conservar o patrimonio viario, mellorar a integración co entorno urbano e avanzar cara a unha Compostela máis accesible e pensada para as persoas.
