O peche das Festas da Peregrina en Bertamiráns tivo como protagonista a inmigración, un dos asuntos de maior presenza no municipio. A comisión de festas escolleu para o pregón final a Ronald Rojas, veciño venezolano que leva varios anos residindo en Ames e que relatou, ante a praza chea, as dificultades e logros do seu proceso de integración.
O acto comezou coa intervención do alcalde, Blas García, quen destacou a necesidade de apostar pola integración nunha sociedade diversa e plural e de combater os discursos de odio. A presidenta da comisión, María Gestoso, agradeceu a colaboración de todas as persoas e institucións implicadas e animou a aproveitar o derradeiro día de celebracións.
No seu discurso, Ronald Rojas, que alternou castelán e galego, explicou que chegou en 2019 a Galicia tras deixar Venezuela por mor dunha situación complicada. Recordou que, na súa chegada, contou coa axuda dun amigo galego que lle deu acubillo, e insistiu en que un dos pasos clave para adaptarse é acudir ás institucións locais e abrirse á relación coa comunidade.
O pregoeiro destacou que, malia chegar con necesidades, sempre procurou achegar algo á sociedade que o acolleu, e que os inmigrantes teñen moito que ofrecer en aspectos como a valorización da familia e a alegría nas festas populares. Tamén subliñou a empatía que percibe cara aos venezolanos pola memoria da emigración galega a aquel país, estendendo a súa mensaxe a todas as persoas que chegan a Galicia.
O pregón rematou cunha cita de Rosalía de Castro e cun agradecemento expreso á veciñanza de Bertamiráns, á que declarou o seu afecto: “Gústame a xente, gústame Bertamiráns e gústame Galicia. Amo a Deus e que Él vos bendiga a todos”.
