O Pico Sacro, un dos espazos máis simbólicos do imaxinario galego e do Camiño de Santiago, volverá abrir as portas da súa cova interior o sábado 16 de agosto cun total de catro novas visitas guiadas organizadas polo Concello de Boqueixón e a Federación Galega de Espeleoloxía. A iniciativa, titulada Baixadas espeleolóxicas ás covas do Pico Sacro, permitirá a dezaseis persoas explorar un dos enclaves xeolóxicos máis singulares de Galicia nun percorrido vertical, técnico e cheo de lendas.
As quendas de visita serán ás 10:00, 12:00, 16:00 e 18:00, cun máximo de catro participantes por sesión, co obxectivo de garantir a seguridade e o acompañamento individualizado por parte de persoal técnico da Escola Galega de Espeleoloxía. O punto de encontro será o aparcamento do Pico Sacro, dende onde se iniciará o percorrido cara á entrada da cova. O prezo da actividade é de 30 euros por persoa, que inclúe material técnico (casco, frontal, buzo e guantes), seguro e monitoraxe especializada.
A visita, con aproximadamente hora e media de duración, comeza cunha explicación básica do uso de cordas, arneses e escaleiras, imprescindibles para abordar a entrada vertical polo coñecido como Pozo do Pico, onde se realiza un descenso por dous rápeles de 6 e 13 metros respectivamente. O percorrido continúa polo Pazo da Raíña Lupa, un dos puntos lendarios da cova, e remata cun ascenso final de 8 metros ata saír á Contramina de Juan Antón, tamén coñecida como Burato dos Mouros.
Dende a organización recoméndase levar roupa e calzado cómodos e pechados, axeitados para un entorno subterráneo. Para anotarse cómpre escribir ao correo espeleoloxia@gmail.com. Tamén se ofrece información adicional a través do teléfono da Federación Galega de Espeleoloxía (982 507 227), operativo de luns a venres en horario de 9:30 a 13:30.
A actividade busca poñer en valor un enclave único no contexto xeolóxico galego, xa que o Pico Sacro é unha montaña de cuarzo nunha contorna dominada polo granito, e as súas covas forman parte do reducido grupo de cavidades visitables de Galicia, xunto coa coñecida Cova do Rei Cintolo en Mondoñedo. Esta combinación de relevancia patrimonial, xeolóxica e simbólica converte cada visita nunha experiencia de descubrimento que mestura ciencia, historia e mitoloxía.
