Un accidente de tráfico ocorrido na tarde deste luns na confluencia da avenida da Liberdade coa rúa María Casares, no barrio compostelán de Santa Marta, saldouse con varios feridos, entre eles a concelleira do Partido Popular en Santiago, María Baleato.
Segundo diversas fontes, o sinistro tivo lugar pouco despois das 19:00, cando por causas que aínda se investigan, dous turismos colidiron, provocando que un deles acabase envorcado sobre a calzada.
A situación xerou unha importante mobilización de medios de emerxencia. Ata o lugar desprazouse unha dotación dos Bombeiros de Santiago, ante a sospeita inicial de que podería haber persoas atrapadas nos vehículos. Finalmente, os efectivos non tiveron que realizar traballos de excarceración, pero colaboraron para facilitar a saída dunha das ocupantes feridas, que necesitaba asistencia médica.
O Servizo de Urxencias Sanitarias atendeu unha muller que resultou ferida, mentres que o resto das persoas implicadas presentaban feridas de carácter leve. Entre estas atopábase María Baleato, edil popular no Concello de Santiago, que viaxaba nun dos vehículos accidentados.
No operativo tamén participaron efectivos da Policía Local, encargados de regular o tráfico na zona e de elaborar o atestado para esclarecer as causas do accidente. A confluencia afectada, unha das vías con maior intensidade circulatoria da zona sur de Compostela, rexistrou retencións puntuais como consecuencia do sinistro.
