O portavoz do Partido Popular en Santiago, Borja Verea, reclamou este luns a paralización inmediata da venda de catro parcelas municipais a promotores privados para a construción de vivenda protexida. Segundo o líder da oposición, o actual goberno do BNG e Compostela Aberta está a “mercantilizar” o solo público ao optar por un modelo que, ao seu xuízo, encarece o prezo das vivendas, retrasa os prazos de entrega e privatiza patrimonio municipal valorado en seis millóns de euros.
Nunha rolda de prensa celebrada esta mañá, Verea sostivo que o acceso á vivenda “é o principal problema da cidade” e acusou ao goberno local de agravar a situación coa súa política urbanística. Criticou especialmente o sistema de adxudicación das parcelas, no que “o 85% da puntuación se outorga a quen paga máis”, o que interpreta como unha mostra de que o único obxectivo é recadar. Ademais, denunciou que non se prevé a cesión en dereito de superficie, “polo que as vivendas non volverán nunca ao patrimonio público”, e advertiu que non se esixe ningún prazo de construción, o que podería abrir a porta á especulación.
Segundo os cálculos presentados polo PP, co modelo actual, unha vivenda de 82 metros cadrados custaría “no mellor dos casos” arredor de 180.000 euros, mentres que cun modelo 100% público deseñado polo seu partido o prezo reduciríase a 100.000 euros, con mellores calidades e dispoñibilidade máis inmediata.
O portavoz popular cualificou de “obscena” esta operación e criticou que se anuncie como unha resposta á crise de vivenda, mentres os datos “son incuestionables”: o alugueiro medio en Santiago pasou de 390 euros en 2014 a 623 en 2024, un incremento do 60% nunha década, etapa que, segundo Verea, estivo marcada pola xestión do BNG, Compostela Aberta e o PSdeG.
Como alternativa, o PP compostelán propón unha nova política de vivenda baseada na promoción pública directa. Entre as medidas incluídas estarían a creación dun banco público de vivendas en alugueiro, a modificación do Plan Xeral de Ordenación Municipal para facilitar novas promocións, e a reutilización de vivendas valeiras co respaldo da administración. Tamén apostan por permitir vivendas en baixos nos barrios de Conxo e Santa Marta e por unha regulación zonificada das vivendas de uso turístico, sen aplicar “prohibicións totais”.
No plano competencial, Verea ofrece dúas vías: que sexa o propio Concello quen promova vivendas públicas ou que traslade o solo á Xunta de Galicia, que segundo el “xa está construíndo vivenda 100% pública noutras cidades”, con opcións como o dereito de superficie, que permitiría que as vivendas revertesen ao patrimonio público ao cabo de 50 anos.
En relación coa taxa turística, o PP mantén a súa postura crítica e condiciona o seu apoio a tres requisitos: acordo co sector, definición detallada do destino dos fondos e informe técnico favorable. “Non rexeitamos a taxa, rexeitamos as chapuzas”, afirmou Verea, que asegurou que o goberno local pretende impoñer a medida “sen diálogo, sen planificación e con advertencias negativas dos propios técnicos municipais”.
Finalmente, e ao ser preguntado pola programación das Festas do Apóstolo, evitou valorar o programa actual pero defendeu que, no caso de gobernar, o PP reforzaría a presenza de artistas galegos e santiagueses, sen renunciar a “equilibrar” a oferta con actuacións nacionais e internacionais que proxecten a cidade.
Verea concluíu reiterando que, fronte ao modelo actual, o PP aposta por vivenda pública, prezo accesible e calidade, advertindo que a venda das catro parcelas é un “ataque ao interese xeral” e que, de gobernar, non converterían o solo público nun “recurso de financiamento” do Concello.
