O Pazo de Amarante, en Santiago de Compostela, acolleu esta semana unha nova sesión de traballo do Comité Internacional de Expertos do Camiño de Santiago, un encontro centrado na planificación de diversas iniciativas cara ao próximo Ano Santo de 2027. A reunión contou coa presenza do director de Turismo de Galicia, Xosé Merelles, que puxo en valor a actividade do Comité na “difusión e promoción” do Camiño e na posta en valor “de toda a cultura xerada ao redor das rutas xacobeas”.
Durante o encontro avaliáronse varias propostas para o ciclo xacobeo, entre as que destaca a organización dun Congreso Internacional do Comité de Expertos ao longo do 2027. Ademais, está prevista a realización de varias exposicións temáticas ao longo do ano e unha participación destacada nunha xornada sobre peregrinacións que terá lugar en Núremberg (Alemaña) no mes de outubro dese mesmo ano.
De cara ao ano previo, en novembro de 2026, avanzouse tamén na preparación dun Coloquio Internacional dedicado ao Camiño Portugués, que terá como escenario a cidade fronteiriza de Tui, un dos principais puntos de acceso desde Portugal.
A internacionalización do Camiño foi outro dos eixes do encontro, coa presentación de varias iniciativas procedentes de Brasil. Entre elas, salientan o Ciclo de Estudos Composteláns e a terceira edición do Congresso Internacional Sacralidades Medievais: Divulgação Científica e Publicização do Caminho de Santiago no Brasil, que terá lugar en abril de 2026.
O Comité tamén aproveitou a reunión para revisar o estado da revista Ad Limina, publicación especializada en estudos académicos sobre o Camiño de Santiago e o fenómeno das peregrinacións, así como para tratar outras cuestións organizativas e estratéxicas que afectan ao funcionamento do propio organismo.
A cita consolida o papel de Santiago como centro de referencia para a reflexión e planificación das actividades culturais e de investigación arredor do fenómeno xacobeo, nun momento no que xa se perfila a programación do vindeiro Xacobeo.
