O xardín da Oficina de Acollida do Peregrino, en Santiago de Compostela, conta desde hoxe cunha nova escultura que interpela directamente á conciencia social de quen a contempla. Trátase de ‘Homeless Jesus’ (‘Xesús sen fogar’), unha peza do artista canadense Timothy Schmalz, que foi inaugurada esta mañá polo arcebispo compostelán Francisco Prieto.
A escultura amosa unha figura humana deitada nun banco público, envolta nunha manta e co rostro cuberto. Só as feridas nos pés revelan que se trata dunha representación de Cristo. A peza convida, ademais, á participación directa, pois deixa un espazo baleiro no banco para quen queira sentarse ao seu carón. Segundo se destacou no acto inaugural, a intención da obra é visualizar a presenza de Cristo entre as persoas excluídas e lembrar o capítulo 25 do Evanxeo de San Mateo, onde se recoñece a Xesús nas figuras máis vulnerables: os famentos, os enfermos, os presos ou quen non teñen fogar.
A instalación desta escultura foi posible grazas á doazón de Diane e Tim Needles, unha parella procedente de Cleveland (Ohio, EUA) coñecida polo seu compromiso coa atención ás persoas desfavorecidas. A obra, feita en bronce e de máis de dous metros de longo, forma parte dunha serie de esculturas idénticas situadas en distintos lugares do mundo, incluídas a Cidade do Vaticano, Nova York, Madrid ou Barcelona.
O escultor Timothy Schmalz, que leva máis de dúas décadas creando obras de gran formato, é recoñecido polo seu traballo figurativo con forte carga espiritual. O seu obxectivo é que as esculturas non só conmovan a quen as observa, senón que tamén os impulsen a reflexionar e a sentirse parte da obra. ‘Homeless Jesus’ foi concibida en 2013 como unha denuncia simbólica da situación das persoas sen fogar e xa se converteu nun ícono global de compaixón e xustiza social.
Con esta nova instalación, Santiago de Compostela súmase á rede internacional de cidades que acollen esta obra, reforzando así a súa dimensión espiritual, hospitalaria e de acollida tamén para quen sofren ás marxes dos camiños e da sociedade.
