O Club Galego de Automóbiles Antigos volverá quedar fóra das celebracións do Apóstolo en Santiago. Por segundo ano consecutivo, o Concello rexeitou autorizar a tradicional concentración de coches clásicos na Praza do Obradoiro, un evento con preto de corenta anos de historia que viña celebrándose cada verán na capital galega coincidindo coas festas patronais.
O concelleiro do Partido Popular en Santiago, José Ramón de la Fuente, denunciou publicamente esta negativa, que cualificou de “arbitraria e partidista”. O edil popular subliñou que a decisión do goberno municipal liderado polo BNG carece de xustificación obxectiva, ao tratarse dun evento “sen incidencias e con ampla aceptación social” en todos os anos previos á súa suspensión.
“É incomprensible que se denegue esta concentración mentres que en setembro se autoriza outra de características practicamente idénticas”, afirmou De la Fuente, quen fixo referencia a unha cita similar autorizada polo Concello noutra data do ano. Segundo a súa versión, a única diferenza entre ambos eventos sería a entidade organizadora, o que “evidencia un criterio ideolóxico na xestión dos espazos públicos”.
O representante do PP acusou ao executivo de utilizar a programación cultural con criterios excluíntes, e de “discriminar iniciativas consolidadas só por non encaixar na súa visión política”. Nesa liña, insistiu en que a concentración de coches clásicos mantén o seu atractivo noutras localidades galegas, como ocorreu recentemente en Ribadeo, onde foi “un dos actos máis concorridos das festas”.
A organización do evento, que reúne cada ano vehículos históricos e centos de persoas afeccionadas, considera que a Praza do Obradoiro é o espazo máis representativo para desenvolver unha actividade que combina patrimonio material e cultural. O club organizador lamenta que, por segundo ano, non se poida levar a cabo en Santiago, malia a súa longa traxectoria e boa acollida.
