O mediocentro Xoel Trasancos Atadell, coñecido como Trasi, continuará vestindo a camisola da SD Compostela ata o ano 2026. O club compostelán anunciou a renovación do futbolista natural de Viveiro (29/09/2003), que ocupa ficha sub23 e que xa tivo un papel relevante durante a pasada campaña.
Trasi, que debutara en partidos oficiais co primeiro equipo durante a tempada 2023/24 cando aínda militaba no filial, fixo a súa estrea completa na 2024/25. Neste último curso, participou en 16 encontros oficiais: 12 de Liga e 4 da Copa Federación, afianzándose como un xogador con capacidade para abarcar moito terreo de xogo e gañar duelos físicos, dous dos aspectos máis valorados polo técnico compostelán Fabiano Soares ‘Secho’.
Formado nas categorías inferiores do CD Lugo e do Viveiro CF, Trasi chegou a Santiago no seu último ano como xuvenil, incorporándose ao CD Conxo Santiago na categoría de Liga Nacional. Tras unha tempada destacada, deu o salto ao Sigüeiro FC, equipo filial do Compos, onde xogou 65 partidos oficiais en Preferente, acumulando máis de 5.100 minutos e marcando 2 goles, alternando adestramentos co primeiro equipo.
O club destaca del a súa intelixencia táctica, a súa intensidade física e tamén a súa capacidade para xestionar a posesión, unha combinación de características que lle permite encaixar no modelo de xogo proposto por Secho para o novo proxecto do Compos 2025/26, que ten como obxectivo o ascenso a Segunda RFEF.
Con esta renovación, o equipo compostelán dá continuidade a unha peza clave da súa medular, confiando nun perfil que combina xuventude, experiencia no club e ambición competitiva. Trasi, pola súa banda, amosa a súa determinación por consolidarse no once titular e contribuír ao salto de categoría: “teño moitas gañas de seguir demostrando o meu nivel e de conseguir o ascenso co Compos”.
