A Policía Nacional detivo 16 persoas no marco da ‘Operación Bachata’, entre elas dúas en Santiago de Compostela e Monforte de Lemos, por formar parte dunha presunta organización criminal dedicada a extorsionar usuarios de páxinas web de contactos. A banda utilizaba o método coñecido como a estafa do “falso sicario”, ameazando ás vítimas con represalias físicas ou danos á súa reputación se non realizaban pagos económicos.
A investigación comezou tras a denuncia dun mozo en Pamplona, que chegou a pagar preto de 20.000 euros por medo ás ameazas. A denuncia foi determinante para que a Brigada de Policía Xudicial iniciase as pescudas, constatando posteriormente que polo menos outras nove persoas foran vítimas de extorsión en distintos puntos do Estado, cun total de máis de 100.000 euros entregados á organización.
Os detidos operaban desde varias localidades como Madrid, Málaga, Sevilla, Alacante ou Xirona, e contaban con colaboración de traballadoras das páxinas para obter datos persoais das vítimas. Algunhas destas persoas actuaban como “mulas” para recibir os cartos, mentres que dúas serían os presuntos líderes da trama. A operación continúa aberta e a investigación está agora a cargo da Audiencia Nacional, debido á gravidade e alcance dos feitos.
