A autora milanesa Arianna Squilloni e a ilustradora madrileña Raquel Catalina Ledesma foron as gañadoras do XVIII Premio Internacional Compostela de Álbum Ilustrado co proxecto titulado ‘Grande e pequena’. Ademais, a obra ‘A espera’ de María Paz García Finch, de Santiago de Chile, recibiu unha mención especial por parte do xurado.
O premio, organizado pola editorial Kalandraka e o Concello de Santiago, conta cunha dotación económica de 9.000 euros e leva a publicación da obra gañadora en galego, catalán, eúscaro, castelán e portugués no mes de novembro. ‘Grande e pequena’ impúxose nunha edición do galardón ao que se presentaron 288 proxectos, 70 máis que na anterior, procedentes de 16 países: Alemaña, Arxentina, Brasil, Chile, Colombia, España, Estados Unidos, Francia, Honduras, Israel, Italia, México, Perú, Polonia, Portugal e Turquía.
Da obra gañadora, os membros do xurado destacaron que se trata dun traballo que “responde perfectamente o concepto de álbum ilustrado, onde o texto e a ilustración compleméntanse de forma harmónica”. Así mesmo, sinalaron que é un álbum “cun sutil fondo poético e de múltiples lecturas: o paso do tempo, a memoria, a natureza, a arte…”. Pola súa banda, a alcaldesa de Santiago, Goretti Sanmartín, cualificou o galardón de “premio consolidado”, do que destacou “a súa calidade, o número de proxectos e a variedade de países de procedencia das obras”.
O xurado estivo conformado pola ilustradora Mariana Río; a xestora cultural e editora Raquel López Royo; o deseñador gráfico, artista plástico e ilustrador Pep Carrió; o pintor, deseñador gráfico e ilustrador Xosé Cobas; e a directora editorial de KALANDRAKA, Manuela Rodríguez. Ademais, a alcaldesa e, por delegación, a concelleira de Educación, Míriam Louzao, actuaron como presidentas do xurado; e a técnica do Departamento de Educación, Beatriz Varela, como secretaria.
