A rúa do Pombal reabriu hai uns meses ao tráfico tras máis de oito meses de obras cun investimento superior aos 760.000 euros. A intervención municipal procuraba renovar as infraestruturas básicas, ampliar beirarrúas e mellorar a accesibilidade, ademais de incorporar un carril específico para bicicletas en sentido subida. Con todo, as primeiras impresións da veciñanza combinan satisfacción co resultado xeral e críticas a aspectos do deseño que afectan ao uso cotián do espazo.
Varios veciños da zona expresaron as súas opinións a Xornal de Compostela sobre a nova configuración da rúa. “Penso que quedou ben e que está ben distribuído”, sinala un veciño, que tamén recoñece que “foron oito meses de moitos inconvenientes para a circulación, pero mereceu a pena”. Non obstante, considera “cuestionable” que os peóns deban circular agora por unha única marxe da rúa, cando antes utilizaban ambas beirarrúas.
A circulación peonil é, precisamente, un dos puntos máis debatidos. Outras persoas apuntan que “agora van todos pola beirarrúa que ten sombra” (que non é unha beirarrúa, senón un carril bici), o que pode provocar encontros inesperados con ciclistas que utilizan o carril reservado. “Se vén unha bicicleta e non toca o timbre, unha pode ser atropelada, e a culpa parece que é nosa”, comenta unha usuaria habitual da rúa.
Tampouco pasou desapercibido o acabado do firme, que para unha das veciñas consultados “quedou bastante mal, porque fai como ondas”, o que podería afectar á comodidade e seguridade do tránsito rodado, especialmente coas primeiras chuvias.
A reforma da rúa forma parte dunha estratexia municipal máis ampla para mellorar os espazos públicos do casco urbano de Compostela. Segundo informou o Concello, os traballos incluíron tamén a renovación completa das redes de saneamento, abastecemento, iluminación e telecomunicacións, así como a instalación de mobiliario urbano e zonas de descanso, aínda que iso provocou cortes de auga inesperados na rúa. Ademais, habilitáronse novas áreas para carga e descarga e paradas de uso exclusivo para residentes.
A obra, non obstante, non estivo exenta de polémica. Dende a oposición denunciouse a “falta de diálogo coa veciñanza” e puxéronse en dúbida certos aspectos técnicos do proxecto. A edil non adscrita Mercedes Rosón alertou, por exemplo, de que a superficie “parece estar excesivamente puída” e preguntouse “se os coches non escorregarán Pombal abaixo” co tempo.
