A primeira quenda de 2025 dos Bonos Corazón, impulsada polo Concello de Santiago, pechouse esta semana cun balance de case un millón de euros en vendas mobilizadas nos establecementos da cidade. A campaña contou cunha achega pública de 300.000 euros e acadou un total de 984.232,96 euros en vendas, segundo os datos facilitados pola concelleira de Promoción Económica, María Rozas.
A maior parte do consumo rexistrouse no sector comercial, onde se gastaron 924.584,54 euros, fronte aos 59.648,42 euros contabilizados na hostalería. En total, 15.000 bonos foron descargados, dos cales case 13.200 foron utilizados: 13.167 no comercio e 1.638 na hostalería.
Rozas salientou a ampla participación do tecido económico local: “541 establecementos adheríronse a esta primeira campaña do ano”, indicou, destacando que se trata dunha medida que “demostra unha vez máis o seu impacto positivo no comercio de proximidade”. A edil tamén lembrou que esta é a primeira vez que os Bonos Corazón se distribúen en dúas quendas anuais, co obxectivo de estimular as vendas en períodos tradicionalmente baixos, como a primavera e o outono.
A segunda campaña activarase en outubro e contará cunha dotación idéntica de 300.000 euros, polo que a contía global para 2025 ascende a 600.000 euros. As persoas que non puideron adquirir bonos nesta primeira fase, poderán facelo entón. Segundo explicou Rozas, o propósito do programa é “dinamizar o comercio local precisamente nas épocas do ano nas que o consumo tende a descender”.
