O Concello de Santiago de Compostela vén de poñer en marcha unha campaña de información a pé de rúa sobre as boas prácticas na separación dos residuos domésticos, cun foco especial na fracción orgánica. A iniciativa, que se desenvolverá de martes a sábado, céntrase no casco histórico e no Ensanche, zonas nas que se detectan máis dúbidas sobre o uso dos colectores e os horarios establecidos para o depósito de lixo.
O concelleiro de Sustentabilidade e Servizos Básicos, Xesús Domínguez, explicou que esta nova campaña busca “transmitirlle á veciñanza as boas prácticas na separación en orixe das distintas fraccións de residuos e resolver dúbidas sobre o seu tratamento, horarios e localizacións dos colectores”. Destacou especialmente a importancia de concienciar sobre a fracción orgánica: “Esta supón aproximadamente a metade do lixo que xeramos no fogar, en peso, por iso é prioritario facelo ben”.
Neste sentido, os equipos informativos encargados da campaña están a realizar rondas diarias de vixilancia, resolvendo cuestións relacionadas co uso dos colectores de envases lixeiros, papel-cartón, vidro, orgánico e resto, así como supervisando o correcto uso dos colectores de alivio.
Un dos informadores, Gael, indicou que unha das principais confusións da cidadanía está na diferenciación entre o colector de resto (gris) e o marrón, este último destinado aos residuos orgánicos: “Moita xente non está aínda familiarizada co colector marrón e é importante saber que para usalo correctamente cómpre dispor dunha chave específica que permite a apertura do contedor e evita impropios”.
A respecto dos horarios, Domínguez lembrou que todas as fraccións poden depositarse durante as 24 horas, agás o vidro, que debe evitarse en horario nocturno por cuestións de ruído. O resto de residuos, que representa só un 10% dos residuos totais se se realiza unha boa separación, debe depositarse unicamente entre as 21:00 e as 23:00 horas.
A campaña pretende reforzar a idea de que unha separación axeitada permite reducir significativamente a cantidade de lixo acumulado no fogar, ademais de contribuír á mellora da xestión ambiental na cidade. Desde o Concello insisten en que o cumprimento destas prácticas facilita a recollida, mellora a reciclaxe e optimiza o uso dos colectores dispoñibles.
A medida súmase a outras iniciativas municipais orientadas a promover un modelo de cidade máis sostible e comprometida co medio ambiente, no marco da estratexia local de xestión de residuos.
