A Cámara de Comercio de Santiago de Compostela celebrou esta semana o éxito de dous dos seus participantes no programa europeo Erasmus for Young Entrepreneurs (EYE), que acadaron a condición de finalistas nos premios EYE Entrepreneur of the Year 2025. Trátase de Ignacio Márquez Collazos, cofundador da iniciativa Rural Hackers, e Nuria Álvarez Rodrigo, responsable da empresa Agroberry, recoñecidos polo seu labor transformador nos seus respectivos sectores.
Este recoñecemento insírese nun programa europeo que facilita intercambios transnacionais entre novos emprendedores e empresarios experimentados, promovendo o aprendizaxe mutuo, o desenvolvemento de competencias clave e a cooperación internacional. A Cámara de Comercio compostelá, como entidade intermediaria, leva dez anos facilitando estas estadías, con máis de 220 relacións establecidas e un impacto destacado en toda Europa.
No caso de Ignacio Márquez, o seu proxecto Rural Hackers, centrado na revitalización das zonas rurais a través da tecnoloxía e a arte, foi recoñecido logo dunha estadía profesional en Singapur. Márquez destacou que o programa permitiulle “transformar a forma en que conectamos co mundo tecnolóxico corporativo”, e asegurou que a experiencia lle serviu para establecer alianzas sólidas con empresas que agora apoian as súas iniciativas.
Pola súa parte, Nuria Álvarez, fundadora de Agroberry, foi recoñecida pola súa participación como empresaria de acollida dun novo emprendedor italiano, que durante catro meses colaborou no desenvolvemento dun novo produto. A súa empresa, dedicada á produción ecolóxica de zarzamora, leva anos sendo referencia pola súa aposta por prácticas sostibles e innovación no agro, e suma múltiples galardóns como o Premio Mundo Rural 2024 ou o Premio Clea á Innovación Feminina 2023.
Ambos finalistas coincidiron en destacar a importancia destes programas de mobilidade profesional para fortalecer o vínculo entre as institucións e a realidade empresarial. Márquez e Álvarez sinalaron que iniciativas como o EYE contribúen a fomentar o emprendemento sostible, a modernizar o rural e a inspirar a novas xeracións de profesionais.
A participación da Cámara compostelá no programa EYE foi recoñecida a nivel europeo con premios como o de Mellor Presentación de Consorcio en 2021. Actualmente, a entidade continúa a súa implicación co programa cunha dotación de máis de 300.000 euros ata 2027, e cun índice de satisfacción que supera o 90 % entre os seus participantes.
