A concelleira do Partido Popular en Santiago, Olaya Otero, presentou este luns unha proposta pública para reclamar ao goberno local actuacións inmediatas no barrio de Sar, co obxectivo de mellorar as condicións de seguridade e accesibilidade para a veciñanza. A popular denunciou o que considera unha situación de abandono por parte do executivo municipal, que segundo afirmou, “non está a atender nin sequera as necesidades máis básicas deste barrio da capital galega”.
Entre os puntos concretos que require o PP compostelán, destaca a reparación do paso superior de madeira da rúa de Sar, que, segundo Otero, convértese “nunha pista de patinaxe cada vez que chove”. A edil explicou que a solución non debería implicar unha gran obra, xa que “bastaría con aplicar un verniz antiescorregadizo e realizar labores regulares de limpeza” para evitar a acumulación de musgo, herba e follas.
Outro dos elementos que centra a preocupación da formación popular é o estado da ponte romana de Sar, cuxo pavimento presenta lousas soltas, algo que, segundo Otero, “dificulta o tránsito de vehículos e representa un risco tanto para condutores como para o propio ben patrimonial”. A concelleira alertou de que esta situación non só afecta á mobilidade senón tamén á conservación dun elemento histórico que debería estar protexido e ben mantido.
CRÍTICAS Á XESTIÓN MUNICIPAL
Durante a súa intervención, a concelleira do PP criticou o que cualificou de “desleixo xeralizado” do goberno local, ao que acusou de non escoitar as demandas dos propios barrios nos que viven os membros do executivo. “Se nin sequera prestan atención aos lugares que pisan todos os días, que pode esperar a veciñanza doutros puntos do concello?”, preguntouse.
Otero engadiu que o mal estado das beirarrúas en varias rúas de Sar obriga os peóns a camiñar pola estrada en determinados tramos, o que incrementa o risco de accidentes e prexudica especialmente ás persoas maiores ou con mobilidade reducida.
Tamén criticou a falta de coidado do patrimonio na zona histórica, facendo referencia á presenza de pintadas e carteis nas paredes e portas do Casco Histórico, e pediu unha actuación decidida por parte do Concello para garantir o respecto polo valor cultural da cidade.
CHAMAMENTO Á ACCIÓN
Desde o grupo municipal do PP, sinalan que esta é unha reclamación máis das que teñen trasladado nos últimos meses e que non será a última se o goberno non actúa. “Pedímoslle ao executivo local que atenda dunha vez ás necesidades da veciñanza e actúe con responsabilidade na conservación dos espazos públicos”, concluíu Olaya Otero.
A formación popular indica que continuará recollendo as demandas dos veciños e veciñas de Sar e doutros barrios composteláns, co obxectivo de levalas ao pleno municipal e esixir respostas concretas por parte do goberno local.
