A alcaldesa de Santiago, Goretti Sanmartín, asegurou este mércores que non contempla a posibilidade de que os orzamentos da capital galega non saian adiante. A preguntas dos medios sobre se contemplaría vincular as contas a unha moción de confianza, a rexedora foi tallante: “Non contemplo a posibilidade de que salga mal”.
Nesta liña, tras comunicar este martes o PSOE as expulsións dos concelleiros expedientados Gonzalo Muíños, Mercedes Rosón, Milagres Castro e Marta Álvarez, Sanmartín reiterou que houbo unha negociación na que participaron “as seis persoas que conforman hoxe o Grupo Municipal Socialista“. Nesas reunións, insistiu, “tivéronse en conta as súas achegas e chegouse a un acordo asinado”.
“Aos veciños de Santiago impórtalles non moito o que son cuestións de conflitos internos que se teñen que resolver; o que lle interesa é que poida haber uns orzamentos e que as necesidades de Santiago de Compostela se poidan cubrir“, manifestou antes de apelar á “responsabilidade” e “altura de miras” para que poida haber presupostos.
En todo caso, a alcaldesa asegurou que polo momento non lle consta comunicación oficial da expulsión dos edís Gonzalo Muíños, Milagres Castro, Mercedes Rosón e Marta Álvarez. No momento en que se produza, engadiu, será o secretario quen diga “cales son as directrices e que hai que facer”. “Nese momento comunicarémolo, pero aínda non teño constancia desa cuestión”, aseverou para, a continuación, sinalar que trasladarán “o procedemento, os prazos e que se realizará”.